Bihar election osang ajanga linük nung temelenshi adoktsü: Sena

New Delhi, November 08 (Agencies): BJP aitsüba dak sentakba olen ka nung tanü Maharashtra nung BJP den teloktep party, Shiv Sena-i, Bihar election osangji ajanga ‘lenir ka (PM Modi) jenjang mejungi akumba sayur’ ta ashiba den külemi iba osang ajanga linük yimtenren nung temelenshi tasen ka adoktsü, ta ashi.
Sena lenir, Sanjay Raut-i, tang Maharashtra nunga assembly election agira election osangji kasa dang asütsü, ta ashi.
“BJP-i Ato kilonser Narendra Modi lenisüba nung Bihar election nung raraogo. BJP-i ibaji au ta agizüktsüla. Tamakok anguba ajanga lenir ka jenjang tamajungba akumba sayur. Tang Maharashtra nunga election agira, Bihar nung ama election osangji kasa dang asütsü,” ta Sena leniri ashi.
Election ji lenirtem tejak repranger rarar ta shia pai, taoba Lok Sabha election tamakok anguba tenüngji Congress Tir Sonia Gandhi-i agi, ta ashi.
“Nitish Kumar ya takok angur nüngtugu kümogo. Pai takok angutsüji Bihar-i nüngdaka liasü. Pai Bihar atema mapa tajung inyakogo. Shiv Sena tenüng nung ni pa nem tenüngsang agütsür. Bihar election osang ajanga linük yimtrenren nung temelenshi tulu adoktsü,” ta pai ashi.
BJP-i tamakok angubaji Ato kilonser Modi-i election nüboyim 30 shi nung shilem agiba dak keta lir asü ta asüngdangba langzüdang Raut-i, “Election ajakji lenir ka tenüng nung rarar. Iba lenir jagi iba ya agizüktettsüla,” ta ashi.
“BJP-i jembiba otem ajanga takoksa ajuru ama ni bilemer. Linük Temzüng nung menden tulutiba nung alisangji ajemalur ka asütsüla,” ta paisa shisem.