Bihar election osangji PM Modi mapa ajanga lir: Kejriwal

New Delhi, November 08 (Agencies): Bihar assembly election nung BJP-i aniba teloktep NDA-i tamakok angubaji Ato kilonser Narendra Modi-i inyakba mapatem ajanga lir, ta Deobar nü Delhi chief minister Arvind Kejriwal-i ashi.
Osangbenertem senden ka nung AAP lenir Kejriwal-i, JD-U, RJD aser Congress teloktepi Modi aser BJP National Tir Amit Shah asüküm aser mezümeküm raksatsüogo, ta ashi.
“Bihar election osang ajanga, nüburtemi yimtenren nung tesempatep inyakyim magizüker ta kuli sayuogo,” ta ashi.
Tan Bihar election nung Kejriwal-i Nitish Kumar pusema liasü aser pai Bihar Chief minister-i takok tulu anguba atema tenüngsang agütsüogo.
“Iba linük nüburtemi Modi nem bendang linük semdangba anendaktsüner aser India nung mapa inyakdaktsüner,” ta Kejriwal-i ashi.
Taküm February ita nung Delhi assembly election nung BJP madak takok tulu angusang Arvind Kejriwal-i, “Bihar election osang ya ajanga Centre sorkari Delhi nungi temzüng alema state maparen nung jangjongba anentsü ni imlar, ta ashi.