Bihar election shilem 4 buba nung vote shilem 58 agütsüogo

Muzaffarpur (Bihar), November, 01, 2015: Deobar nü Bihar assembly election shilem pezübuba nung Muzaffarpur district nung vote agütsütsü atema tetsür aser teburtem tarensen balala nung noktaktepa aliba noksa nung angur. 

Patna (Bihar), November 01 (Agencies): Tanü Bihar nung assembly election shilem pezübuba nung vote agütsütsüpur nisung million 14 nungi shilem 58-i vote agütsüogo, ta election ketdangsertemi metetdaktsü.
Tanü district tenet kübok constituency 55 nung vote agiba sülen Ato kilonser Narendra Modi-i, Bharatiya Janata Party (BJP)-i Chief Minister Nitish Kumar’er teloktep madak takok angutsü ta ashi. Ano Kumar-ia par teloktepi takok angutsü ta shiogo.
Additional Chief Electoral Officer, R. Lakshmanan-i, Maoists telungpurtem junga amenoka aliba tesemtem densema tesem ajak nung election süngjema agitetogo, ta ashi.
Tanü nikongdang 4:00 ako tashi nung vote shilem 55.32 agütsür liasü aser 5:00 ako tashi nungbo vote agütsüba shilem 58 jungatok.
Tanü Gopalganj, Siwan, West Champaran, East Champaran, Sheohar, Sitamarhi aser Muzaffarpur district tem kübok menden 55 atema candidate 776-i toktepogo.
Bihar assembly election shilem pongububa aser tatembabubaji November 5 nü agitsü aser November 8 nü vote azüngtsü.