Bihar election shilem asembuba nung million 7-i vote agütsüogo

Patna (Bihar), Oct. 28, 2015: Bodhbar nü Bihar Assembly election shilem asembuba agidang Patna nung nüburtem vote agütsütsü atema tarensena noktaka aliba noksa nung angur.

Patna, October 28 (Agencies): Bodhbar nü Bihar assembly election shilem asembuba nung constituency 50 nung nisung million tenet jungnüai vote agütsüogo.

Chief Electoral Officer, Ajay V Nayak-i, tanü nisung 59 puogo, iba den külemi motorcycle 38 aser pistol ana puogo, ajisüaka election süngjema agitetogo, ta ashi.

Saran district, Taraiya Assembly nung arishi küm 123 tantsür katia vote agütsüogo, ta paisa ashi.

Nikongdang 4:00 ako tashi nung vote agütsütsüpur million 14.5 nungi shilem 45.59-i vote agütsü.

Maoists telungpurtemi timtem agütsüba constituency 10 nungbo nikongdang 4:00 ako tashi nung vote agütsüba maparen tembanga liasü.

Tanep 7:00 ako nungi tenzüka Patna, Saran, Vaishali, Nalanda, Bhojpur aser Buxar district tem nung vote agütsü.

Bollywood actor aser BJP MP, Satrughan Sinha-i Patna nung vote agüja liasü.

Ano RJD tongti lenir, Lalu Prasad aser pa kinüngtsü aser taoba chief minister Rabri Devi den jala Misa Bharti aser jabaso Tej Pratap nungeria Patna nung vote agütsüogo.

Vote agütsüba sülen Ato kilonser Narendra Modi aija Lalu Prasad-i, “Reservation onük nung Modi-i communal politics asayar. Ato kilonseri item oji jembitsü ta nüburtemi meimlai liasü,” ta ashi.

Senior BJP lenir aser taoba mapang Bihar deputy chief minister, Sushil Kumar Modi-i Patna nung aser Chief Minister Nitish Kumar-i Bakhtiyarpur constituency nung vote agüja liasü.

Association for Democratic Reforms & National Election Watch-i ashiba agi, tanü agiba election nung candidate 215 anemabo nisung tepsetba densema ken o balala benoka lir.

State nung October 12 nü constituency 49 nung aser October 16 nü constituency 32 nung election agiogo. Shilem pezübuba election November mezüngnü agitsü.