Bihar election tatembangbuba anogo nung vote shilem 59 agütsü

New Delhi, November 05 (Agencies): Brihostibar nü Bihar assembly election shilem tatembangbuba anogo nung vote agütsütsüpur shilem 59.46-i vote agütsüogo.

Tanü Madhubani district nung vote shilem 55.87 agüja liasü, Supaul district nung shilem 58.60, Araria nung shilem 62, Kishanganj nung shilem 61.54, Purnea nung shilem 62.95, Katihar nung shilem 67.27, Madhepura nung shilem 57.84, Saharsa nung shilem 50.78 aser Darbhanga nung vote shilem 58.27 agütsüogo.

Tanü vote agütsür tongtibang nisungtem rongnung BJP National otongdar, Shahnawaz Hussain aser JD(U) National Tir, Sharad Yadav na densema liasü. Lenir anapronglai, tan election nung parnok party-i 2/3rd majority ajanga takok angutsü ta shiogo.

Tanü election agiba constituency 57 nung ya Seemanchal region nungi menden 24 lir. Tanü nüburtemi agütsüba vote ajanga candidate 827 nungi parnok 57 shimtsü. Candidate rongnung parnok 58 bo tetsürtem lir.

Tanep 7:00 ako nungi tenzüka constituency ajak nung vote agütsü tenzük aser nikongdang 5:00 ako nung tembang, ajisüaka Maoists telungpurtemi timtem agütsüba tesem Saharsa district nung Simri Bhakhtiyarpur aser Mahisi na nungbo nikongdang 3:00 ako tashi nungbo vote agütsüba tembanga liasü.

Bihar nung Muslim nütsüng shilem 16.5 lir. Ajisüaka Seemanchal region nungbo- Kishanganj nung Muslim nütsüng shilem 67, Purnea nung shielm 37, Katihar nung shilem 47 aser Araria nung Muslim nütsüng shilem 40 jungnüa lir.

Tanü yimtenren mongin Mahender Yadav-i, “Brihostibar nü agiba election nung Muslims aser Yadavs-i tongtibang shilem agitsü,” ta shiogo.

BJP-ia Muslim nunger vote lemdangtsü ta bilema Seemanchal tesem nung aliba assembly mendentem nung tenük yoka liasü.

Election nüboyim sentong aika nung Ato kilonser Narendra Modi-i Bihar chief minister Nitish Kumar, RJD tongti lenir, Lalu Prasad aser Congress Tir Sonia Gandhi nunger sashia aija aruogo. BJP-i Modi dak rangloker takok angutsü kanga imladar, iba dak alia upper castes – Brahmins, Bhumihar, Rajputs-i parnok pusemtsü ta imlaa liasü.

Tan agiba election nungsa Hyderabad MP Asauddin Owaisi’er party, All India Majlis-e-Ittehad-ul Muslimeen (AIMIM)-ia tang mezüng Bihar nung takok angutsü asü ta aikati repranga atadar. Parnoki Seemanchal tesemtem nung candidate trok toktepdaktsüogo, Item tesemtem nung Muslim nütsüng aika lir.

October 12 nü nungi tenzüka shilem pongu lemsar agiba Bihar assembly election tanü tembangogo aser November 8 nü vote zünga election osang sangdongtsü.