Bihar Grand Alliance-i tanü Nitish lenir shimtsü

Patna (Bihar), November 13 (Agencies): Bihar nung tang sorkar tashi nung aliba Janata Dal-United (JD-U) nungi tang MLA tasenpurtemi Honibar nü Nitish Kumar legislature party lenir shimtsü, iba sülen Grand Alliance legislature party nunga pa lennir inyaktsü atema shimtsü, ta JD(U) osang ka ajanga ashi.
Hokolbar nü JD-U state Tir, Vashsisht Narain Singh-i, “Honibar nü yangi (Patna) senden ka amenba mapang tamasa JD(U) nung MLA tasenpurtemi JD-U legislature party lenirji Nitish Kumar shimtsü. Iba sülen JD-U, RJD aser Congress MLA tasenpurtem arok senden nung Secular teloktep legislature party lenir atema Kumar shimtsü,” ta metetdaktsü.
Bihar chief minister aser JD(U) lenir Kumar-i, November 14 nü cabinet senden tatembangbuba amenba sülen state legislative assembly anentsütsü atema benoktsü ta tamalen metetdakja lir. Kasa anogo nung secular teloktep party tem senden amenba sülen pai aniba sorkar tasen akümtsü atema benoktsü.
Ano külen Rashtriya Janata Dal (RJD) nungi tang takok angurtem MLA tasenpur senden ka mena parnok legislature party lenir shimogo.
Nisung aikati RJD tongti lenir, Lalu Prasad’er jabaso tanubosang Tejaswi Yadav-i tongti menden ka angutsü südi ta imladar. Tan election nung RJD-i menden timba (80) nung takok ngua liasü.
Honibarnüsa Congress MLA tasenpurtema senden amentsü.
JD (U) lenirtem osang ka ajanga angazükba agi, November 20 nü Nitish Kumar-i anir par council of minister 36 tenangzükba agitsü.
Bihar election metenzükdangyongi secular teloktepi Chief Minister candidate atema Nitish Kumar shima liasü.
Bihar sorkar tasenba nung Lalu Prasad’er party RJD nungi minister 16, JD-U nungi minister 15 aser Congress nungi minister 5 asütsü.