Bihar ketdangsertemi state adener-a yi ajemtsü makok: Nitish

Patna, February 17 (Agencies): Bihar state nung yi mokdanger ita 10 jungogo aser Chief Minister, Nitish Kumar-i maneni ozüng tesashi yanglua, state ketdangsertemi state adener aser bendang linüktem nunga yi majemtsü ozüng yangluogo.
Tan hopta tetenzüklen ozüng yanglushibaji Bihar Cabinet-i agizükogo, anungji tang nungibo ketdangsertem, obendangertem mesüra magistrates shirnoki alima tesem mashie nung yi jemdir parnok nem temerenshi agütsütsü.
Aibelenertem mapa nungi anentsütsü akok mesüra itasen nungi sen katitsü.
Ketdangsertem aser obendangertem atema iba ozüng latettsüba mezüngbuba state ji Bihar asütsü.
Tawa lokti senden ka nung nisung kati Chief Minister dang, ketdangsertem dak-a yi ajemba tendangtsü akok asü, ta asüngdanga liasü. Nisungba jagi, yi tenokdangba liaka ketdangsertemi yi ajemer, ta shia liasü.
Ketdangsertem tanga state mesüra bendanglen senzüdang yi ajemba mittsü atema sorkar sentong kechisa ali’ar mejangja. Osang ka ajanga ashiba agi, ketdangsertemi tangalen alidang yi ajemba ken o agütsüra iba sülen ang bushisüngdangtsü.
Yaküm April ita nung Bihar state nung yi khenyongi nokdangba sülen Nitish Kumar-i, “Iba ya asentenshi mera tajung ka lir, kechiyong iba telemtetba ajanga khen nung ozüng alema inyakba mapatem ajema akum, tamangba lokti tsüngda yimjung yimjung asentenshi aser nüburtem achi-ajemba yimya melenshi,” ta ashi.
Taoba ita Kumar aser pa den teloktep party lenir, Lalu Yadav-i anir nisung merirjang aika adenshia yi nokdangba anema teka amteper sentong ka agia liasü. Iba sentong nungji yimtenren nung tanemer party, BJP-ia shilem agi.
State nung yi junga nokdangtetba atema Ato kilonser, Narendra Modi-ia Nitish Kumar nem tenüngsang agütsüogo.