Bihar LS election atema BJP aser JDU na menden kasa lemsatsü

New Delhi, Mongputeni/October 26 (Agencies): Sangküm Lok Sabha election nung Bihar state nung Bharatiya Janata Party (BJP) aser Bihar nung tongti teloktep party, Janata Dal (United) na menden kasasa lemsar tokteptsü, ta tanü BJP National Tir, Amit Shah-i metetdaktsü.
BJP Tirisa, BJP-i aniba National Democratic Alliance (NDA) teloktep dak sendakba nung Upendra Khushwaha aser Ram Vilas Paswan natia tokteptsü, ta ashi.
Shah-i, “Bihar nung 2019 küm Lok Sabha election nung BJP aser JDU nati menden kasa lemsar tokteptsü telemtetba agiogo. Tanga teloktep party tem nema menden tapet lemzüktsütsü. Anogo ishika tsüngda menden alemba osang tejangja sangdongtsü,” ta metetdaktsü.
BJP telung osang ka ajanga, sangküm Lok Sabha election nung JDU-i menden 16 aser BJP-i menden 17 nung tokteptsü ta angzükba sülen tan hopta tetenzüklen JDU-i, parnoki teloktep party (BJP) nem menden ka danga tali magutsütsü, ta metetdakja liasü.
Yaküm JDU lenir aser Bihar Chief Minister, Nitish Kumar-i Rashtriya Janata Dal aser Congress den teloktep raksar BJP den lokteper state sorkar küma liasü.
Taoba ita Nitish Kumar-i, ajaki agizüktettsüsa telemtetba ka agiogo aser kobii melii iba sangdong agutsütsü, ta metetdakja liasü.
Bihar nung Lok Sabha menden 40 lir aser Lok Sabha menden timtiba aliba state tem tarensen jenjang pongububa nung Bihar lir.
Lok Sabha menden timtiba aliba state ji Uttar Pradesh (menden 80) lir, iba sülen Maharashtra (menden 48), Andhra Pradesh (menden 42) aser West Bengal (menden 42) stae tem lir.