Bihar, Madhubani bus lendong nung nisung 32 asü

Madhubani, September 20 (Agencies): Tanü Bihar, Madhubani district nung nija bus ka awatsüng nung tsükokba lendong nung tajemba agi nisung 32 süogo.
“Iba bus lendong nung nisung ajak agi parnok 32 süogo. Tasümang ajakji tzü telung nungi agitetogo,” ta Madhubani District Magistrate, Giriwar Dayal Singh-i ashi.
District headquarters nungi kilometer 50 shi pila aliba Basaitha chowk nung atalokba lendong nung bus mena alir passenger timbaka tzü wadanga kümzük aser karbo bus nungi pongzüka alu, ta District Magistrate-isa ashi.
Nija bus nungji nisung 65 shi mener Madhubani nungi Sitamarhi-i aodang state highway nung tsükok. Bus ji tzü telung nungi agitetogo.
Iba osang angashia Patna nungi state Chief Minister, Nitish Kumar-i asüko osang lemsatepba den külemi iba tatalokba kuli bushisüngdangtsü, ta metetdaktsü.
Kumar-isa Revenue minister, Madan Mohan Jha aser Panchayati Raj minister, Kapildeo Kamat na dang lendong atalokba tesem jagi aotsü tuyua liasü.
Teyari mapang shitak nung magütsüba agi yimtaklirtemi tejashi nung Superintendent of police, Deepak Kumar Barnwal den tangar police tem dak long agi aon, ajisüaka sepai tali arusemba sülen parnoki iba tesem tonga otet.
Chief minister-isa ketdangsertem dang teyaritep mapa inyaktsü tuyuba den külemi asür kibongtem nem senotsü teyari agütsütsü tuyu.