Bihar, Muzaffarpur district gari lendong nung nisung 14 tsükset

Patna, July 25 (Agencies): Tanü Bihar, Muzaffarpur district kübok Ahiyapur tesem nung bus ka aser auto ka tsüktepba lendong nung tanurtem densema nisung 14 tashi tsüksetogo.
Ano iba dang nungi tali asütsüsa akok, kechiyong yirua alirtem rongnung karbo kanga mejungi yirua lir.
Iba lendong nung asür shia kinüngertem nem senotsü teyari lakh 4 agütsütsü, ta state sorkari sangdongogo.
Yirua alirtemji Sri Krishna Medical College & hospital-i anir oa yaridar.
Iba lendongji Jhaphan nung aliba CRPF camp anasa Muzaffarpur-Sitamarhi marg nung atalok. Iba lendong atalokli CRPF sepaitem arua garitem nungi yirua alirtem aniteta teyaritep mapa inyaka liasü.
Iba tesem anasa alir aika adenshia longkak aita gari lenmang nokdangba sülen district magistrate iba tesem jagi aru.
Iba tatalokba sülen bus anisang jagi bus bener jena ao, ta osang angazüker.
Auto ji Purnia-i aodang aser  bus ji Muzaffarpur-i aodang iba lendong atalok.  Auto nung mena alir teimba ka asü aser aika mejungi yirua lir.
Osang ka ajanga ashiba agi, asürtem rongnung tanur pezü den tetsür ana densema lir.
Asürtemji Purnia nung alirtem lir aser parnokji Muzaffarpur nungi par yimtsüngi meyipa aodang iba lendong atalok.
2014 küm nunga Bihar nung gari lendong balala nung nisung 4,000 dak tema süogo.