Bihar nüburi Modi’er sorkar dang mepelar: Congress

New Delhi, November 08 (Agencies): Bihar assembly election nung JD(U), RJD aser Congress party tem teloktepi takok tulu anguba sülen tanü Congress-i, Bihar election osangji Ato kilonser Narendra Modi-i inyakba mapatem ajanga lir ta ashi.
Congress Party General Secretary, Shakeel Ahmed-i, BJP-i Delhi assembly election nung tamakok anguba sülen ano Bihar nunga tamakok anguba ajanga yimtenren forces ano tanaben longjemshitsü, kechiyong taoba Lok Sabha election nung apuba ‘ballon’ tang tatemsa pokrepogo, ta ashi.
“Atangji, iba ya ajanga pa (Modi) lenisüba sayutsü. Linük ajunga nung atalokba ama, Ato kilonser aser par sorkar dang Bihar nüburtem-a mepelar,” ta party General Secretary Shakeel-i osangbenertem dang ashi.
Bihar election osang ya Modi’er sorkar dak aket asü (?) ta asüngdangba langzüdang Congress leniri, “Election nüboyim sashia agitepba mapang BJP-i state BJP lenirtem sentoker Modi dang ajungket,” ta ashi.
“Ajaklen Ato kilonser aser BJP Tir Amit Shah na noksa dang liasü, saka state lenirtem noksabo meliasü, parnokji sentok,” ta Bihar nung Congress senior lenirisa ashi.
Paisa ashiba agi, Assembly election agiba state nung Ato kilonseri nüboyim senden 31 tashi nung jembiogo, shitakba agibo Ato kilonser kati senden 4-5 nung dang jembitsüla.
Ano tasüngdangba ka langzüdang Ahmed-i, “Par party telung nunga Narendra Modi dang jashir. Kechiyong pai takokji tashiyim agi angu.
Ano Congress lenir Rashid Alvi-ia, Bihar election nung tamakok ya BJP-i tamakok anguba masü saka Ato kilonser Modi tamakok lir. Iba election ya Bihar Chief Minister Nitish Kumar aser Ato kilonser Narendra Modi na tsüngda raraba liasü, anungji tamakok anguba atema Modi-i pasasa tenüng agitsüla aser menden nungi alutsüla, ta ashi.
“Delhi nung tamakok anguba ajanga BJP-i tangazüktsü lesson magi. Tang Bihar nüburtemi parnok dang lesson tulu ka sayuogo,” ta pai ashi.