Bihar nüburtemji tekolok techira, mapa nung temerang: Modi

Madhubani, November 01 (Agencies): Bihar assembly election atema nüboyim sentong ka nung tanü Deobar nü Ato kilonser Narendra Modi-i, Bihar nüburtemji tekolok kanga techira, mapa nung kanga temerang aser tasen purapitetba shisatsü lir, ta tenüng sanga jembiba den külemi state nung par party, BJP tashii arura Bihar shia arudaktsütsü, ta nangzükogo.
Bihar, Madhubani district nung nüboyim sentong ka nung jembidang Modi-i, par party-i nüburtem anema alibaren atema facility tajungtiba agütsütsü, shisaliok tajungtiba aser mapa agütsütsü, ta ashi.
Ibaji takoktsü mapa ka lir, kechiyong state nung aliba nüburtem dak ibaji akoktsüsa lir, ta Ato kilonseri ashi.
Paisa, “Bihar tetezü- Brilliant, Innovative, Hard Working, Action Oriented aser Resourceful lir,” ta ashi.
Tan state election nung BJP-i aniba NDA-i two-third majority agi takok angutsü imlar, ta paisa shiogo.
Tanü Bihar district tenet kübok constituency 55 nung election tagitak süaka Modi-i tanen makai nüboyim sentong nung jembia liasü.
State nung terenlok maliba atema Bihar chief minister, Nitish Kumar aser RJD tongti lenir, Lalu Prasad na aija Modi-i, “Lalu aser Nitish nati küm 25 tashi Bihar yimsü süogo, ajisüaka parnoki nüburtem nem kechi agütsü,” ta asüngdang.
Tang tashi Bihar nübur aikati sign asütsü-a memetetba atema sasa bilemer, ta Modi-i ashi.
“Karpuri yimtsüng nungi tetsür kari kü nem temepishiba ka agütsüogo. Parnoki ashiba angatsü atema Bihar sorkar nung nisung shinga mali, iba yongji parnoki Ato kilonser dangi arutsüsa akum,” ta Modi-i ashi.
“Nenok mangdang ataloktsü atema ni nenok teyari aginer. Anungji BJP nem vote agüjang aser onoki iba ya asangsang nung ataloktsütsü,” ta Ato kilomnser-isa shisem.