Bihar nung aliba Prayas Bharti indang Shelter Home nung tetsür 20 samaogo

Patna/New Delhi, Luroi/August 04 (Agencies): Bihar nung shelter homes balala nung nisung samaba osang kanga buluba mapang ka nung maneni melungtet telok Prayas Bharti-i lapokba shelter home ka nung tetsür 20 samaogo, ta osang ka ajanga metetdaktsü.
Osang angazükba agi, Bihar kübok Sadisopur, Bihta area nung aliba shelter home nung ketdangsertem densema tetsür 20 sama.
Tawa Bihar, Muzaffarpur nung aliba shelter home nung tetsür 34 dak tashiyim amshia taküm raksatsüba osang jungkai adoka liasü. Ano iba jakdang Bihta shelter home nunga tetsür 10 samaba atema ken o ka benoka lir.
Muzaffarpur shelter home nung tashiyim amshia tetsürtem taküm raksatsüba tatalokba nung ajemdaker Rashtriya Janata Party (RJD)-i tanü linük yimtiba, Delhi nung aliba Jantar Mantar nung Bihar Chief Minister Nitish Kumar-i aniba JDU-BJP sorkar anema longkak aitba anogo nung iba osang ya angashir.
Longkak aitba sentong nung longsoa shilem agitsü ayongzüka RJD lenir aser taoba Bihar Deputy chief minister, Tejashwi Yadav-i Twitter ajanga, “Delhi nung alirtem, tanü nikongdang Jantar-Mantar nung onok den külemi linük nung aliba tetsürtem akhümket atema aser kümzüka alitsü atema longkak aitba nung shilem agiang. #MuzaffarpurMassRape,” ta ayongzüka liasü.
Iba dak alia Delhi Chief Minister, Arvind Kejriwal-ia Twitter ajanga nüburtem dang RJD-i ayongba longkak aitba sentong nung shilem agitsü ayongzüka liasü.
Muzaffarpur shelter home nung atalokba ken o nung Supreme Court nung Justice Madan Bhimrao Lokur aser Justice Deepak Gupta nati akumba Division bench-i Bihar aser Centre sorkar naprongla dang iba osang tejangja agujang, ta tuyuogo.
Iba ken o nung tongti tai tonglokja alisangji, Brijesh Thakur lir.