Bihar nung BJP-i menden 160, LJP-i 40, HAM(S)-i 20 nungi tokteptsü

 

New Delhi, September 14 (Agencies): October 12, 2015 nü nungi tenzüka Bihar assembly election agitsü aliba atema NDA teloktep nung aliba party tem tsüngda menden alemtsü asoshi anogo aika jembia aruba sülen tanü parnok tsüngda menden alemba osang sangdongogo.

Assembly menden 243 nungi BJP-i menden 160 nung tokteptsü, Mahadalit lenir Jitan Ram Manjhi’er HAM(S) party-i menden 20 nungi tokteptsü aser Ram Vilas Paswan’er LJP-i menden 40 nungi tokteptsü.

Ano tanüngba menden 23 nungi Union minister Upendra Kushwaha’er RLSP-i tokteptsü

Tanü New Delhi,BJP Head office nung osangbenetem den jembidang BJP Tir Amit Shah-i, “BJP-i aniba NDA nung adenba party ajaki Ato Kilonser Narendra Modi lenisüba kübok Bihar election nung tokteptsü melungtepogo. Iba election nung takok tulu angutsü NDA-i melung alemer,”  ta ashi.

Iba teloktep nung tongti lenir Paswan, Kushwaha aser taoba state Chief minister Manjhi nunger lia BJP National Tir Amit Shah-i, telongjem NDA-i Chief Minister Nitish Kumar, RJD chief Lalu Prasad aser Congress nunger teloktep anema state nung two-third majority ajanga takok angutsü, ta ashi.

Bihar Chief Minister Nitish Kumar aija Shah-i, “Nitish Kumar-i Bihar nung temzüng alema inyakba malitsü nangzüker, saka pai ochimashiba Party, Congress aser Lalu Prasad den lokteper,” ta ashi.

“Bihar terenlok dak sentakba nung ni ya jangja jangja ashir, Nitish Kumar-i terenlok agütsübaji pa BJP den atenba mapang tashi liasü. Osang tai ajanga pai Bihar nübur anisar. Ozü party ‘BJP’-i Bihar sorkar toktsüba mapang nungi tenzüka state nung arem yimsüsüba lir,” ta paisa ashi.

“Ato kilonser Narendra Modi-i Bihar atema senotsü teyari sangdongogo, ajisüaka iba atemaji Nitish Kumar-i pa dang pelaba melemsatep,” ta Shah-i aitsüogo.

NDA teloktep nung party ajaki agizüktettsüsa menden lemtetba dak sentakba nung Shah-i, “Arr atsütepba mali. Tarentak kecha mali. Nenoki parnok (Paswan aser Manjhi) tejak nung menürem jakden angur,” ta ashi.

Shah-isa, Manjhi’er party lenir karbo BJP temaitsü nung tokteptsü, ta ashi.

Tamalen BJP-i menden 13 nungi 15 tsüngda agütsüba nung Manjhi-i anogo aika memelungi ano menden timba agüjang ta khanga aruogo.

Menden lemsaba osang menoa sangdongba ajanga pa mepelar asü ta asüngdangba langzüdang Manjhi-i, menden alemba dak sentakba nung mangatettep maliasü aser NDA-i akokba tashi takok angutsüpur candidate tem toktepdaktsütsüla,  ta ashi.