Bihar nung BJP-i menden 170 nungi tokteptsü

Baghalpur, August 25 (Agencies): NDA nung külem teloktep party anati BJP dang hopta ka tsüngda Bihar assembly election asoshi menden lemsatsüla, ta metetdaktsüba sülen anogo ka lir tanü BJP-i sangdong ka ajanga, assembly menden 243 nungi party-i menden 170 nung tokteptsü, ta ashi.

Tanü Bagalphur nung taoba mapang minister aser tang MP teinyaktak Ashwani Kumar Choubey-i, “BJP-i menden 170 jungnüa nungi tokteptsü, iba dakji alaka tajemba masütsü,” ta ashi.

NDA nung teloktep party- Lok Janshakti Party (LJP) aser Rashtriya Lok Samata Party (RLSP) nati, BJP-i menden 102 nungi dang tokteptsüla aser tanüngba teloktep party asem nem menden 141 yutsütsüla ta sangdongba dak sentakba nung tanü BJP leniri iba sangdong tasen agütsüogo.

“NDA tsüngda menden lemsaba onük nung BJP aser Ato kilonser Narendra Modi na dang sayutsüngitsüsa linük nung nisung shinga mali,” ta Choubey-i ashi.

Ano NDA teloktep nung tasembuba party, Hindustani Awam Morcha (HAM) nungi taoba state Chief minister Jitan Ram Manjhi-ia, BJP-i menden 122 nungi dang tokteptsüla, ta tanü shiogo.

“JD-U, RJD aser Congress teloktep tamakok ngudaktsütsü asoshji parnoki tanüngba mendenji teloktep party asem nem agütsütsüla,” ta HAM lenir Brishen Patel-ia shiogo.

NDA sorkar nung teloktep party, Lok Janshakti Party (LJP) aser Rashtriya Lok Samata Party (RLSP)-i Hombar nü BJP dang, Bihar state Assembly election atema hopta ka tsüngda menden alemtsüla, ta shiogo.

Yashi LJP office nung osangbenertem senden ka ayongzüka jembidang LJP state Tir Pashupati Kumar Paras aser RLSP state Tir Arun Kumar nati, “Election agitsü ita ana shi dang lir, anungji onoki ozü candidate tem tatemsa shimtsü asoshi teloktep nung party tuluba, BJP-i tekaraba nung menden lemsaba sangdongtsüla,” ta jembia liasü.

Osang ajanga angazükba agi, LJP-i menden 75 nungi toktepner aser RLSP-ia menden 67 nung toktepner.