Bihar nung Class 12 topper police-i apu

Patna, June 2 (Agencies): Hokolbarnü Bihar School Examination Board (BSEB)-i Class 12 ‘topper’ Ganesh Kumar takok agienba sülen police-i pa puogo.
Tanü kanga dang aritepa jatepba osangbener senden ka nung, Kishore-i “BSEB-i iba dak sendakba FIR ka benoktsü aser board-i Ganesh indang Class X Matriculation result-a sota ayur” ta metetdaktsü.
Ganesh Kumar-i tatidang agütsütsü atema pa arishi küm miimbangtsü atema taila kulikakettem amshi. Ganesh indang shitakba arishi kümji 42 lir saka pai pa arishi küm 24 tain ta taila kulikaket agütsü, ta BSEB chairman Kishore-isa shisem.
Ganesh indang answer script reprangertem pusema Kishore-isa ashiba agi, “pa indang answer sheet ji kanga tajung liasü. Mongin nisung ka nema reprangdaktsüogo aser aibelen kecha maliasü ta paia kuli agütsüogo. Ajisüaka, onoki iba maparen bushisüngdang südar.”
Taküm Bihar board tatidang indang result ji May 30, 2017 nü sangdong aser iba nung kaketshir noklang nung shilem 65-i tamakok ngua liasü.
Ajisüaka, Ganesh-i Chhakhabib yimtsüng nung aliba Ramnandan Singh Jagdip Narayan High school nungi board tatidang agütsüba nung pai 82.6% takok ngua Class 12 nung mezüngbuba jenjang takok angu.
Result adokba sülen pa ajungbena samaba aser pai music & home science subject tem shimba ajanga ketdangsertemi pa dak temulung melemi bilem.
Iba sülen TV news channel kati Ganesh Kumar den sensaksemdang, pai tazüngba tsütsü telangzüba shitak magütsütetba osangtem prokshiba sülen tanü BSEB-i iba telemtetba agitsüsa aküm.
Ganesh-i humanities stream nung 82.6% nguteta mezüngbuba jenjang takok angu. Pai Music indang practical examination nung marks 70 nungi 65 angu aser theory nung 20 nungi 18 angu. Paisa Hindi nung marks 100 nungi 92 nguteta liasü.
Ajisüaka, osangbenertemi pa dang pai agiba subject tem indang asüngdangdang, telangzüba shitak magütsütet aser Music practicals nung komaser pai junga shilem agi ta metetnüa asüngdangdang, Ganesh-i Bollywood ken ka tensaa aten.
Ganesh ya Jharkhand kübok Giridih nungi lir aser pai ashiba agi, küm ishika tejaklen pa mapa inyaktsü atema Bihar-i aru aser nisung kari pa dang school nung admit asütsü atema ashiba agi admission asü.
Ajisüaka, school ketdangsertemi ashiba agi, Ganesh-i pa sasa mulungteta admission asü.