Bihar nung District magistrate kati mid-day meal chiyung

Patna, December 19 (Agencies) : Bihar kübok Gopalganj district nung aliba sorkar school ka nung mid-day meal anepalur amitsür ka anema yimdaklirtemi noktakba agi la mapa nung anenja liasü saka la tanaben mapa nung aniokogo.

Gopalganj District Magistrate Rahul Kumar ajanga la tanaben mapa nung aniok.

Iba tatalokba atema amitsürlai District Magistrate dang teyari meshi aser iba osang angazükba sülen DM den tanga ketdangsertemi school ji semdang aser amitsürlai anepalua agütsüba mid-day meal achi.

“District education officer künati school semdang aser amitsürlai kaketshirtem atema renemtsüba midday meal chiyung” ta Rahul Kumar-i osangbener dang ashi.

Pai iba mapa inyaka sayuba sülen yimdaklirtem dang parnoki lungkak aitba anentsü aser amitsürla nem mid-day meal maneni anepalua agütsüdaktsütsü mesüzük.

“Parnoki ni yimya tamajung aketba tetsür ka ta aitsü saka ibaji ni kodanga magizüktsü. Kü kinungbo’er kinüngertemi ni meyari” ta Sunita Kanwar-i osangbener dang ashi.

“Ozü tanurtem atema amitsür ka nem mid-day meal anepalu mesüdaktsütsü. Iba ya langka tamajung ka ataloktsü takzüba ka lir. 2013 küm anameta aliba Saran district nung tanur 23 tashi chiyungtsü nung miim chisemer asüba ama ataloktsü onoki tsübur” ta yimdaklir Shiv Bihari Singh-i osangbener dang ashi.

“Takzütakbongba belenshibaji ozüng alema inyakba ka lir aser ozüng alema inyakertem Anti-Superstition and Black Magic Act kübok merenshitsü” ta District Magistrate-i yimdaklirtem dang metetdaktsü.

Taoba Bodbarnü Sunita-i District Magistrate den ajurutep aser la indang timtem metetdaktsü.

Lai DM den ajurutepba sülen, nisung 150 shi ka school-i ao aser shibangtsü. Administration-i la nem maneni chiyungtsü anepaludaktsütsü temelaba agütsüba anema parnoki ola adoka lungkak ait.