Bihar nung gari lenmang yanglushitsü atema WhatsApp sabang amshitsü

Patna, June 30 (Agencies): Bihar Deputy Chief Minister, Tejaswi Yadav-i state nung gari lenmang yanglutsü aser lenmang teraksa yanglushitsü atema Whatsapp sabang amshitsü lemtetogo.
Nüburtemi lenmang teraksa noksa tangoker itemji yanglushitsü atema noksa yoktsü asoshi arishi küm Tejaswi-i WhatsApp number (9470001346) sayaogo.
Road construction minister, Tejaswi-i twitter ajanga, “Output and Performance Based Road Assets Maintenance Contract (OPRMC) tajungba akumtsü atema Bihar nung tangbo nüburtemi lenmang tia noksaji WhatsApp ajanga yoktettsü,” ta metetdaktsü.
Tamalenbo nüburtemi lenmang majungba onükji department dang benokba sülenang concerned engineer nem metetdaktsü, aser ibaji ajanga lenmang yanglushiba maparen kanga menoa liasü.