Patna, June 25 (Agencies): Bihar class 12 tatidang ochimashi ken o nung Humanities topper, Ruby Rai, shibai Political Science subject ajanga sorochioktsü sayur ta ashi, la tanü Bihar yimtiba, Patna nung puogo.
Bihar School Examination Board (BSEB) tatidang agütsüshir aludang Special Investigation Team (SIT)-i Ruby apu, ta SSP, Manu Maharaj-i ashi.
Yashi Patna nung aliba court kati, iba tatidang nung topper pezü nem bail magütsütsü atema tuyuogo, aser parnok rongnung Ruby Rai densema lir.
La den ano topper asemji Science topper Saurbabh Shrestha, third topper Rahul Kumar aser Vishun Roy college Principal, Bachha Rai’er jala, Shalini Rai nunger lir.
Iba tatidang osang sangdongba sülen TV interview ka nung Humanities topper, Ruby Rai-i telangzüba agütsüba ajanga state nung toppers ochimashi ya jungkai adoka liasü.
Lai Political Science olongji “Prodikal science” ta ashi aser iba subject ajanga sorochioktsü sayur, ta ashi.
La tatidang nung takok angubaji tanaben asadangtsü atema subject mongin telok kati la anaben jaoka liasü ajisüaka lai maru. Tanü la tatidang agishitsü atema BSEB office-i arua liasü.
Taoba BSEB chairman, Lalkeshwar Singh indang private assistant (PA) dang asüngdangyaba mapang pai, toppers nung züngoktsü atema sen lakh 15 meshi ta shiogo, ta SSP Maharaj-i metetdaktsü.
Iba ken o nung Singh aser pa kinüngtsü aser taoba mapang JD(U) MLA, Usha Sinha, aser Vishun Roy college secretary-cum principal, Bachha Rai nunger pua lir.
You must be logged in to post a comment Login