Bihar nung JD(U), RJD, Cong longjemba sangdongogo

Patna, August 12 (Agencies): Taruba Bihar assembly election asoshi tanü JD(U), RJD aser Congress party temi parnok longjemba osang sangdongba den külemi parnok tsüngda menden lemsaba osang-a sangdongogo.

Osangbenertem senden ka ayongzüka RJD Tir Lalu Prasad den Congress General Secretary aser Bihar affairs in-charge C P Joshi nunger lia Secular Party asem longjemba aser menden lemsaba osangji Chief Minister Nitish Kumar-i metetdakja liasü.

Iba dak sentakba nung Bihar nung assembly menden 243 nungi JD(U) menden 100, RJD menden 100 aser Congress menden 40 nungi tokteptsü, aser tanüngba menden asem indang osangjibo khen lir ang sangdongtsü.

Osangbenertem den jembidang Nitish Kumar-i, tawa Legislative Council menden 24 asoshi election agiba mapang Nationalist Congress Party (NCP) par party den lokteper toktep aser Bihar assembly election nunga parnok den adentsüa akok, ta ashi.

Iba tetezü Sharad Pawar’er party, NCP parnok den denra tanüngba menden asemji parnok nem agütsütsü südi.

Janata Parivar teloktep nung lenir aser Samajwadi Party tongti lenir Mulayam Singh Yadav menden karbo ngur asü, ta asüngdangba langzüdang Lalu Prasad-i, “paji ozü kinünger aser nüngdak dang süra ni agütsütsü,” ta ashi.

Bihar Chief minister-isa, secular teloktep nung Common Minimum Programme ka alitsü aser September-October nung election agitsü aliba asoshi külemi nüboyimtsü, ta ashi.

“Iba secular teloktep mezüng nüboyim sentongji Patna nung August 30 nü ayongzüka akatsü,” ta Kumar aser Lalu Prasad nati ashi.

Congress General Secretary aser taoba mapang Union minister, C P Joshi-i, par party secular teloktep nung denogo kechiyong parnoki, “tang Ato kilonser Narendra Modi ya linük asoshi tayongzükba tulutiba lir ta bilemer,” ta ashi.

August 30 nü nüboyim sentong nungji Congress Tir Sonia Gandhi mesüra tatong Tir Rahul Gandhi adentsü asü, ta asüngdangba langzüdang Joshi-i, “Item ya sentong nung tena lir, tesülen ang onoki osangbenertem senden balala ajanga metetdaktsütsü,” ta ashi.

2014 Lok Sabha election mapang RJD, Congress aser NCP senteper toktepa liasü aser parnoki menden 40 nungi menden tenet nung dang takok ngutet.

Ano kasa election nungsa JD(U)-i Left party tem den senteper toktep saka parnoki menden ana nungdang takok ngua liasü.