Bihar nung JDU(U)-RJD-Cong-i BJP ajemshia takok nguogo

New Delhi/Patna, Nov. 08 (Agencies): Deobar nü Bihar assembly election osang sangdongogo; Bihar Chief minister, Nitish Kumar leniba nung JD(U), RJD aser Congress teloktep-i BJP-i aniba teloktep NDA madak takok tulu nguogo.
JD(U) lenir Kumar aser RJD tongti, Lalu Prasad nati aniba teloktep-i state nung aliba assembly menden 243 nungi menden 178 tashi nung takok angu. Ibaji 3/4 majority ajungtsü menden 5 agi dang mabensa lir.
BJP-i aniba NDA-i menden 58 dang angu.
Tan election Party sasep nung RJD-i menden 80, JD(U)-i menden 71, BJP-i menden 53, Congress-i menden 27, IND-i menden 4, CPI(ML)(L)-i menden 3, RLSP-i menden 2, LJP-i menden 2 aser taoba Bihar CM, Manjhi’er party HAM(S)-i menden ka dang angu.
Takok anguba sülen osangbenertem senden nung jembidang Nitish Kumar aser Lalu Prasad nati, “Bihar election osang ajanga linük yimtenren kongshitsü,” ta metetdaktsü.
“Nüboyim sentong (BJP nüboyim) sashia kaogo aser tensa raksatsütsü merangogo. Nüburtemi ibaji magizük, telemsa adokdaktsütsü merangbaji magizük. Iba ya takok kanga tulu aser onoki iba takok ya ajemalua agizüker,” ta Nitish Kumar-i ashi.
Ano nisung aika atema tesüngmangtsü osang kaji, Lalu’er party RJD-i menden 80 tashi nung takok ngua state nung single largest party jenjang ngutetogo. Iba ya Lalu atema kanga osang tajung ka lir, kechiyong 2010 assembly election nungbo RJD-i menden 22 nung dang takok ngua liasü.
RJD-i menden timba nguaka Lalu-i, “Maneni Nitish Kumar-sa chief minister asütsü,” ta sangdongogo.
Bihar election osang sangdongba sülen yimtenren party lenir aikati, Bihar election nung tamakok anguba tenüngji Ato kilonser Narendra Modi-i agitsüla, ta jembiogo.