Bihar nung Kejriwal aser Nitish na senteper nüboyimtsü

New Delhi, August 19 (Agencies): Bodhbar nü Delhi Chief Minister Arvind Kejriwal-i taruba election nung pai JD(U) tongti aser Bihar chief minister Nitish Kumar pusemtsü ta metetdaktsüogo.

Tanü Delhi nung Bihar Samman Samaroh senden nung jembidang Nitish Kumar-i pa jaokba asoshi Kejriwal dang pelaba lemsatepogo.

Iba senden nung jembidang Nitish-i, “Nüburtemi AAP nem vote agütsübaji kanga junger. Delhi atema Arvind Kejriwal ji tetemsü. Menden 70 nungi 67 tashi angubaji tesüngmangtsüka lir. Ato kilonser Modi-i linük ama (linüki BJP shimba) Delhi jia kasa jenjang nung lir ta jembiba mapang nung AAP-i iba takok tulu angu. Delhi-i parnok jenjang sayuba sülenbo, tang Ato kilonser Modi-i Bihar nung kanga meranga inyaker,” ta ashi.

Bihar Chief minister pusemtsü ta shia Arvind Kejriwal-i pa dang, nai kodang ni nüngdakdir ni Bihar-i arutsü, ta shiogo.

Kasa senden nung AAP tongti lenir Kejriwal-ia, “Election matongdang Ato kilonser Modi-i langa jembir aser election tembangba sülenbo tangsa ka dang jembir. Rewari rally matongdang OROP scheme atema ano mapang agitsü ta pai jembi asü nungbo, pai vote mangutsü liasü,” ta ashi.

Tawa Ato kilonseri Bihar dang senotsü nangzükba aija Kejriwal-i, “Anogo ana tejaklen Bihar nung Ato kilonseri crore merirjang 50…60…70 ta jembiba asenoki angashiogo. Bihar ayoktsü asoshi pa ao asü (?) Parnok (sorkar) sen aika lira Ato kilonseri mezüng OROP scheme atema inyaktsüla,” ta ashi.