Bihar nung ‘Mukhyamantri Mahila Rojgar’ scheme agizük

New Delhi, August 29 (Agencies): Hokolbarnü Bihar nung Nitish Kumar-i aniba sorkari tetsürtem nem tashi agütsütsü atema ‘Mukhyamantri Mahila Rojgar Yojana’ scheme agizükogo, ta ketdangsertemi metetdaktsü.

Chief Minister Nitish Kumar leniba nung amenba Cabinet senden nung iba scheme agizük. Iba scheme kübok Bihar nung kibong shia nungi tetsür ka nem mezüngbuba instalment nung sen 10,000 agütsütsü. Peii jangraba mapa ka tenzükba nung yariteptsü atema senotsü teyariji agütsür. Iba scheme atema kobi melii maparen tenzüktsü aser senji beneficiaries indang bank account nung indangindanga inoktsütsü.

Tetsürtemi peii jangraba mapa ka tenzükba sülen ita trok lir ketdangsertemi ibaji asadangtsü, aser junga inyakertem nembo ano sen lakh anana (2) agütsütsü.

State sorkarisa tetsürtem inyaktetba osettsüset balala ayoktsü atema yimtsüngtem aser jilatem nung haat bazaars amenoktsütsü.

Iba mapatong ajanga tetsür aikati mapa maongka angutsü aser rongsenkettzüng jenjang tajungba akümba den mapa bushia tanga state temi aoba ajema akümtsü.

Iba scheme agizükba sülen Janata Dal (United) MLC, Neeraj Kumar-i Chief Minister Nitish-i state nung tetsürtem taküm jenjang ajungkettsütsü atema maneni inyakba asoshi tenüngsang agütsü.

Neeraj Kumar-i, “Chief Minister Nitish Kumar-i 2005 küm November 24 anogo nungi tenzüka tetsürtem atema mapang tajung aika inyakja arudar. Tangbo asen jalatem aser aianutemi Police Department nunga densema nüburtem kümzüker. Pai aianutem atema mapa tajung aika inyaktsüogo aser Bihar nung tetsürtem nem menden shilem 35 wazüka yutsüogo. Tang  tesüsa pai kibong shia nung tetsürtem tangar dak memetaloki alitsü atema senotsü teyari agütsür,” ta metetdaktsü.