Bihar nung ‘Narendra Modi Chowk’ ta jaloktsür ka lepset

Patna, Metsüremi (March) 16 (Agencies): Bihar kübok Darbhanga district nung arishi küm 70 tain tambur kati “Narendra Modi chowk” ta ajaba atema tepset ta par kinungertemi ashi.
Yangtepnü (Brihostibar) aonung nisung telok kati Ram Chandra Yadav lepset aser iba atema Rogonü (Hokolbar) BJP züngsemtemi gari lenmang mokdanger lungkak ait.
Ram Chandra ji local BJP lennir ka liasü ta shia BJP züngsemtemi pa tepsetertem aputsü atema takhangba agüja lungkak ait.
Babu Bhadwa yimtsüng nung ashishitep aketba kimung ka nung Ram Chandra Yadav-i küm ana tejaklen “Narendra Modi Chowk” ta züluba signboard ka ayu.
Ram Chandra’er jabaso Kamal Yadav-i ashiba agi, yasüng nisung 50 shi motorbike nung mener aru aser parnoki tenüngji melentsü atema takhangba agütsü.
“Parnoki Modi Chowk nungi Lalu Chowk ta nüngja melentsü atema onok dang ashi. Parnoki onok dang o tamajung ashi aser teka sangshi” ta Kamal-i osangbener dang ashi.
Lendong atalokba osang angashili police tesem tonga ao aser idangjisa nisung asem apu, ta DSP Dilnawaz Ahmed-i ashi.
Police-i iba tatalokba atema asüngdangya asüdang, tesüiba mapang nungi ashishitepa aruba kimung iba lendong ya atalok ta bushitetba osang metetdaktsü.
Küm asem tejakdang iba kasa kimung atema kibur raktepdang Ram Chandra’er jabaso ka tepset. Ram Chandra ji BJP lennir masü, ta police-isa shisem.
Ano külen, RJD lennir Vijay Prakash-i ashiba agi. “Ozüng alema inyakertemi RJD aser BJP züngsemtem tepsetba ajanga Nitish Kumar-i sorkar junga ketdang asür ta kuli agütsübaji tiyazü ta sayur.”