Bihar nung nisung million 20-i yi nokdangba pusema shilem agi

New Delhi/Patna, January 21 (Agencies): Bihar Chief Minister, Nitish Kumar-i state nung yi nokdangba mapatong nüburtemi pusema Honibarnü state tesem balala nungi tanur-tain, tetsür-tebur lakh aika adenshia teka amteper ‘human chain’ yanglua liasü.
Tanep Bihar Chief Secretary, Anjani Kumar Singh-i, state nung yi nokdangba nungita parnoki “Alima nung human chain talangtiba, kilometer 11,000 dak tema yanglutsü,” ta metetdakja liasü.
Ketdangsertemi ashiba agi, bendanger satellite ka den Indian Space Research Organisation indang satellite ana, tayimtsü pezü, helicopter ana aser nisung mamenba tayimtsü 40 amshia human chain noksaji tangokogo.
Iba sentong nung Chief Minister, Kumar den par teloktep, RJD tongti, Lalu Prasad aser Congress nungia züngsemtemi human chain nung shilem agi. Iba dak alia opposition BJP lenirtemi iba sentong pusema shilem agi.
Tan ita tetenzüklen BJP lenirtemi ashiba agi, Patna nung senden ka nung jembidang Ato kilonser, Narendra Modi-i Nitish Kumar-i yi nokdangbaji ‘ajungmesoba ka’ lir ta tenüngsang agüja, senso ajaki ibaji takok angutsü atema inyaktsüla ta ayongzükba ajanga parnokia Chief Minister mapatongji pusemtsü atema lemteta liasü.
Ato kilonseri Bihar nung yi nokdangba pusemba ajanga parnoki human chain nungji shilem agitsüsa aküm, ta BJP lenirtemi ashi.
Tanü nikongdang 12:15-1:00 ako tsüngda nisung million 20 shi kati teka amtepa human chain yangluba nung shilem agi, ta ketdangsertemisa ashi.
Anogo ana tejaklen sorkar advocate, Lalit Kishore-i, iba sentong nung temulungertemi shilem agitsü akok, iba nungji shilem agitsü shinga kangshia mali, ta metetdakja liasü.
CM, Kumar-i yaküm April 5 nü nungi tenzüka state nung yi nokdanga liasü.