Bihar nung RJD-i menden 20, Cong-i menden 9 nung tokteptsü

Patna, March 22 (Agencies): Bihar nung opposition party tem teloktep ‘Mahagathbandhan’-i tanü parnok tsüngda menden alemba osang sangdongogo.
Lok Sabha menden 40 aliba state nung Lalu Prasad’er party RJD-i menden 20 nungi tokteptsü, Congress-i menden 9, Upendra Kushwaha’er party Rashtriya Lok Samta Party (RLSP)-i menden pongu, Mukesh Sahni’er party Vikasheel Insan Party (VIP)-i menden asem aser taoba mapang Bihar chief minister Jitan Ram Manjhi’er party Hindustan Awam Morcha (HAM)-i menden asem nungi tokteptsü, ta opposition teloktepi metetdaktsü.
Taoba mapang JD(U) Tir aser NDA convener, Sharad Yadav-i RJD temaitsü nungi tokteptsü aser pai par party Loktantrik Janata Dal (LJD) den loktepogo, ta RJD national otongdar, Manoj Jha aser RJD state Tir, Ram Chandra Purve nati osangbenertem nem metetdaktsü.
Tawa teloktep nung adener Rashtriya Lok Samta Party (RLSP)-i menden pongu aser Vikasheel Insan Party (VIP)-i menden asem nung tokteptsü.
Tanü Bihar yimtiba, Patna nung ayongzükba osangbenertem senden nungji BPCC Tir, Madan Mohan Jha densema Mahagathbandhan teloktep party ajak nungi lenirtem dena liasü.
Ajisüaka tongtibang lenirtem- Tejashwi Yadav (RJD), Upendra Kushwaha, Sharad Yadav aser Jitan Ram Manjhi nungerbo maliasü.
Election mezüngbuba shilem nung tokteptsüpur candidates tenüng sangdongogo. Nominations March 25 nü tembangtsü aser April 11 nü election agitsü.