Bihar nung SP-i menden pongu nungi tokteptsü: Lalu

Patna (Bihar), August 29 (Agencies): Tanü Honibar nü RJD tongti lenir, Lalu Prasad-i, Mulayam Singh Yadav’er party, Samajwadi Party (SP)-i taruba Bihar assembly election nung menden pongu nungi tokteptsü, ta ashi.
“Taruba assembly election atema onoki SP nem menden pongu agütsüogo. Iba ya, ozü party RJD, JD-U aser Congress teloktep lir,” ta tanü Patna nung osangbenertem senden ka nung pai ashi.
Tamalen Lalu, Bihar Chief Minister Nitish Kumar aser senior Congress lenir C.P. Joshi nunger iba teloktep nung menden alemba inyakyim metetdakja liasü.
Iba mapang nungji parnoki, menden 243 aliba Bihar assembly nung Rashtriya Janata Dal (RJD)-i menden 100 nungi tokteptsü, Janata Dal-United (JD-U)-i menden 100 nungi tokteptsü, Congress-i menden 40 nungi aser tanüngba menden asem Nationalist Congress Party nem agütsütsü, ta shiogo.
Ajisüaka tesülen NCP-i parnok nem menden lemzüktsüba agi temelung masüba ajanga parnoki secular teloktep toktsü.
Bharatiya Janata Party-i aniba National Democratic Alliance-i tang tashi nungbo menden alemba osang sangdonga mali.
Bihar Assembly election taruba ita ana tsüngda agitsü sentong lir.