Bihar nung tamakok ngura Modi-i PM menden toktsütsü asü (?): Lalu

Patna, October 12 (Agencies): Bihar assembly election atema Ato kilonser Narendra Modi-i nüboyim sentong aika nung shilem agia aruba aija tanü Rashtriya Janata Dal (RJD) tongti lenir Lalu Prasad Yadav-i, Bihar election nung BJP-i tamakok ngura Modi-i Ato kilonser menden toktsütsü asü (?), ta asüngdangogo.
“Bihar election nung BJP tekolakji Modi lir aser tesüiba ita asem par ministry aser machinery ajaki sashia nüboyimogo. Tamakok anguba sülen pai menden toktsütsü asü(?), ta RJD tongti Lalu-i twitter ajanga ashi.
Bihar nung nüboyimba mapang Modi-i Lalu aser Bihar Chief Minister Nitish Kumar na sashia aija aruogo.
Tanep Bhabua nung election nüboyim sentong ka nung jembidang Modi-i, “Küm 25 tashi ‘adianu tambu’ (Lalu) aser ‘chhota tanobu’ (Nitish) nati yimsü südar, ajisüaka tenati state nung terenlok atema mebilemer,” ta aija liasü.
BJP atema Bihar election ya kanga tongtibang, kechiyong Rajya Sabha nung parnoki züngsem majority nüngdaker. Rajya Sabha nung züngsem ajema aliba ajanga BJP-i aniba NDA sorkari Parliament nung bill aika magizükteti liasü.