Bihar nung teloktep sorkar talangka malitsü: Paswan

Patna, November 29 (Agencies): Tanü LJP tongti lenir aser Union Minister, Ramvilas Paswan-i, state nung RJD aser JD(U) na tsüngda tashi toktepba aser mezümekümba ajanga mapang talangka melii Grand alliance chireptsü aser Bihar nung election agishitsü, ta ashi.
“GA (Grand Alliance) sorkari takok tulu ngur asütsüa akok, saka RJD aser JD(U) na tsüngda pei tuluba ta asükümba ajanga mapang talangka melii election agishitsü,” ta Paswani osangbenertem dang ashi.
Item o jembiba kuli asüngdangba langzüdang Union Food & Consumer Affairs Minister, Paswan-i, RJD aser JD(U) inyakyimji balala ta nisung ajaki meteta dang lir aser tena (party ana) tsüngda tetendangbaji kobi melii angutsü,” ta ashi.
Bihar assembly election nung tamakok anguba sülen NDA teloktep nung BJP den densema aliba party, LJP-i jenjang junga mengutetba kuli reprangshiba senden nung Paswan densema liasü. Bihar election nung LJP-i menden 41 nungi toktep saka menden ana dang nguteta liasü.
Paswan-i, kobi melii RJD-JD(U)-Congress teloktep nung tapok adoktsü, ta ashi.
Paisa, tesüiba küm 10 tsüngda Nitish Kumar’er sorkari Bihar nung Dalit nübur atema tera dang inyaksü, ta aitsü.
Paswan-isa, Scheduled Caste nüburtem dang dalits mesüra mahadalits ta ajabaji pa kanga ashishir, kechiyong linük Temzüng nung ajemzüka aliba section tem maitsü atema nüngja mali, ta ashi.
“SC nübur atema dalit mesüra mahadalit nüngja amshibaji nisung kari okadak benokra ozüng tsüngdangbo mejenbutsü,” ta Union minister-i ashi.
Paswan-isa court balala nung obendangertem shimtsü atema All-India Judicial Services luden alitsüla aser nija sector nung SC/ST aser OBCs atema reservation alitsüla, ta takhangba agütsüogo.