Bihar nung terenlok malibaji Nitish, Lalu ajanga lir: PM Modi

Chhapra, October 25 (Agencies): Tanü Ato kilonser Narendra Modi-i RJD tongti, Lalu Prasad aija, Lalu ya mangatetba nisung ka lir aser par party ji “Rashtriya Jadu Tona Party” lir, ta ashi.
Lalu’er jila, Chhapra nung jembidang Modi-i Bihar state terenlok atema onük trok mapatong ka nangzükogo.
Bihar assembly election nung kin telemsa aser reservation onük nung o toktepba ajanga BJP-i aniba NDA jenjang majungtsü ta meteta Modi-i terenlok onük süoka, “state nung light, lenmang aser tzü den külemi state nung kibong shia nem sen aatsü maongka, shisaliok aser mozü agütsütsü,” ta ashi.
Lulu Prasad aser Bihar chief minister Nitish Kumar aija Modi-i, “State nung tebilemtsü ajurubaji adianu tambu (Lalu) aser adianu tanobu (Nitish Kumar) na ajanga lir,” ta ashi.
Modi-isa, NDA indang nükjidongji terenlok, ta ashi.
Modi-i Nitish aser Lalu na dang, Bihar lanurtem pei taküm atema sen aatsü asoshi shibai state nungi odakja bendanger kümdaktsü (?), ta asüngdang.
“Bihar nüburtem bendanger kümdaktsübaji shirnok ajanga’ar Bihar nüburtemi metetner. Ozü lanurtem shirnoki Bihar nungi minzüka yok. Tesüiba küm 25 nung parnoki lanur puto ana takum jenjang raksatsüogo,” ta Modi-i ashi.