Bihar nung tsüngi agi nisung 56 tashi aiset

Patna (Bihar), June 22 (Agencies): Tesüiba ghonda 24 tsüngda Bihar, Aurangabad district kübok tesem balala nung tsüngi agi tajemba agi nisung 56 tashi aisetba den nisung ti kanga mejungi yiruogo, ta police-i ashi.
District kübok Darmikala yim nung tambur ka den par jabaso alu nungi kidangi shilangdang tsüngi ajanga aiset aser Aarai o Pansa na nunga tsüngi ajanga nisung ana asü.
Bihar Principal Secretary of Disaster Management, Vyas Ji-i, “Asürtem timbaka ali agi yangluba ki nung telitak liasü. Ozü ketdangsertemi item tesem nung timtemertem den yaritepdar,” ta metetdaktsü.
Sorkar ketdangsertemi ashiba agi, alima tzümopung lendong ajanga asürtem kibong shia nem senotsü teyari lakh pezüzü agütsütsü.
Ato Kilonser Modi-i asüko osang lemsatep
Iba osang angashia Ato kilonser, Narendra Modi-i twitter ajanga, “Tesüiba anogo ishika tsüngda Uttar Pradesh, Bihar, Jharkhand aser linük tesem balala nung alima lendong ajanga asüba osang angashia jashir,” ta ashi.
Kasa osang ajanga Modi-i, “Tsüngi ajanga asürtem kinünger aser temeimer tem atema ni sarasademtsür. Yirua alirtem tekaraba nung anepjang ta sarasademtsür,” ta ashi.
Yashi Uttar Pradesh, Ghazipur district nunga tesem balala nung tsüngi ajanga nisung trok aser aser nisung pezü yirua liasü.

You must be logged in to post a comment Login