Bihar nung tzümetsüng nung asürtem nisung 95 jungogo

Patna, August 07 (Agencies): Bihar nung tzümetsüng tensa tamajungba kümdar aser tanüa Katihar district nung nisung pezü asüba osang lir, ibaji züngsemabo tzümetsüng lendong balala ajanga asürtem nisung 95 jungogo.
State Disaster Management department-i, state kübok district 14 nung tzümetsüng ajanga nisung lakh 33 kongshiogo, ta metetdaktsü.
State nung tzümetsüng ajanga nisung timba asüba distict ji Purnia lir, aser iba district nung nisung 28 süogo, iba sülen Araria district nung nisung 21, Katihar nung 19, Supaul nung 8, Kishanganj nung 5, Gopalganj aser Madhepura na nungi nisung pezüzü,  Darbhanga nung asem aser Muzaffarpur, Saran o Saharsa shia nungi nisung kaka süogo.
State nung Mahananda, Bakhra, Kankai, Parmar aser Koshi ayongtem nung tzü tali metsüngba ajanga Purnia, Kishanganj, Araria, Darbhanga, Madhepura, Bhagalpur, Katihar, Saharsa, Supual, Gopalganj, East Champaran, West Champaran, Muzaffarpur aser Saran district tem tesem aika nung tzü metsünga nisung lakh 33 tashi kongshiogo.
Ano Ganga aser Ghagra ayong nung tzü lendongbang nung ayimba ajanga Bhagalpur aser Siwan districts na kongshiogo aser Koshi ayongtzü-a lendongbang nung ayimba ajanga Katihar aser Khagaria district na mejungi kongshia lir.
Ali hectare lakh trok nung tzü metsüngba ajanga ali hectare lakh ana nung tsünüsembongtsü raksaogo aser ketdangsertemi ibaji asadangdar, ta Disaster Management department-isa metetdaktsü.
State nung ki 16,361 raksaba ajanga sen crore 3.52 takoksa nguogo, aser sorkar kiojen raksababo tanga ang asadangdar.
State sorkari rong 1,490 amshia kümzükba maparen inyakdar aser nisung lakh 6.41 bo tzümetsüng tesem nungi aienshidaktsüogo. Item rongnungi nisung lakh 3.86 relief camp 464 nung jenoka lir. Iba dak alia medical team 224-i Relief camp aser tzümetsüng tesem nung shirangertem anepalua yaridar.