Bihar nung yi ajemba atema jabasoi tebu pudaktsü

Patna, December 6 (Agencies): Bihar kübok Bhojpur district nung Army nung anisüngzüker alir ka pur tepuokdak ayu.
Par jabasoi Delhi nung local police dangi phone ajanga tebui kidang meinprong agütsütsü ta osang sangoktsüba sülen tebuji apu.
Nitish Kumar’er sorkari Bihar nung yi nokdangba sülen yi ajembaji non-bailable offence ka lir.
Jagdishpur police station kübok aliba Babhniyav yimtsüng nung Ex-Armyman Rambihari Singh-i yi jemer par kinungertem züka merenshi.
Mongulbar aonunga pai kasa mapaji inyak aser kinungertem dak azük. Iba mapang pa kinungtsüi Delhi nung aliba tena jabaso Bittu Singh dangi phone süa ashi.
Bittu ji Delhi nung nija company ka nung inyaker aser pai osang angashiba sülen Jagdishpur Police station dangi phone asü aser tebu Rambihari anema ken o ka benok.
Iba osang angashili police-i Rambihari apu aser Bodbarnü Arrah nung aliba okadak kati pa dak medical tests asüba sülen tepuokdak ayutsü tetuyuba agütsü.
Bihar state ajunga nung yi nokdangba sülen iba district nung tang mezüng atema yi jemer puogo, ta Assistant Sub Inspector Baidyanath Chaudhary-i osangbener dang ashi.
“Yimtsüng shia nung aliba electric transformer tem nung mobile number tem züluja lir. Yi ajemba mesüra yi shibelenba osang yimdaklirtemi police dang yakta sangoktsütsü atema mobile number tem tesem ajungalen yutsür” ta Chaudhary-isa ashi.