Bihar nung yi litre 60,000 raksaa intok

Rohtas, June 02 (Agencies): Hokolbarnü Bihar police-i Rohtas district nung yi litre 60,000 keta aliba yi pongdang aika raksaa intokogo.
Bihar nung yi rizünga yua alibatem May 31 tashi nung raksaa intoktsü atema tetuyuba agüja liasü, ajisüaka tan ita tetenzüklen Supreme Court-i iba atemaji July 31 tashi mapang atsülangtsüba ajanga state nung yi yanglur kiburtem temelungjang anisüngzük nguogo.
Justice Arjan Kumar Sikri-i aniba Supreme Court, vacation bench kati May 31 tashi mapang latetja alibaji July 31 tashi mapang atsülangtsü.
Supreme Court nung senior lawyer, Kapil Sibal-i Bihar Keshav Mohan tenüng nung benokba onüktem court-i angadanga liasü.
Mohan-i Suprem Court dang, state nung ozüng alema inyakba mapatem jenti benshidar, aser parnok nem mapang matsülangtsütsüla, ta ashi.
Iba sülen yi manufacture asürtem aikati Supreme Court dang state nung rizünga aliba yi raksaa intoktsü mapangji atsülangtsütsü mepishia liasü.
Taküm January ita nung Bihar sorkari Patna High Court nung yi nokdangba anema ozüng yangluba ken oji Supreme Court-i belentsü mepishia liasü.
Tamalen yi company temi yi nokdangba anema Patna High Court nung ken o benoka liasü.
Yi nokdangba ozüng nungji- yi ayoktsü aser ajemtsü memelar, aser iba nungji Indian-Made Foreign Liquor (IMFL) aser state nung yangluba yitem densema lir.
Yaküm Chief Minister, Nitish Kumar-i aniba Bihar sorkari Bihar Prohibition and Excise Act, 2016 tasen benoka liasü, aser iba Act ajanga state nung yi tapu ajak ayoktsü mesüra ajemtsü memelar.