Bihar nung yi mayoktsü

Nagaland nung yi meyanglutsü aser mayoktsü ozüng zünga aliba ya yimsüsürtemi anir nisung aikati  khen meyipa reprangshitsüla ta jembia aliba mapang ka, Bihar nung tan April ita mezüng nü mezüng ghonda nungi tenzüka yi meyanglutsü, mayoktsü aser majemtsü ozüng lateta yur mapa küma inyak tenzükba ya asenok ajak asoshi tayongzükba tuluka asütsü. Atangji, Bihar nunga iba ozüng amshia tenzüka maodangyongi nisung aikati Bihar nung yi nokdangtsübaji makoktsü ta bilema aitsür. Ibaji tebilemla bilemer kechiyong alima nung yi nokdangtsüji temela masü. Ajisüaka, Bihar chief minister, Nitish Kumar-i temulungtetba tulu nung par state nung yi ajemba agi kibong aika raksaba tia ngua iba ozüng ya latetogo. Aji oda, temeim mapa inyaktsü asoshia kidang nungi tama tenzükba ama, yi meyanglutsü, mayoktsü aser majemtsü atema ozüng yangluba ya Bihar nung chief ministeri anir yimsüsür tatartem ajaki tama mapa kuma inyaktsu tenangzükba agiogo. Iba jagi Bihar nung yimten yimsüsürtem dak tangatetba aser temulungtetba tulu reprangtetter. Alima yimya agi yimten nung yimsüsürtem aikati yi ajemer, anungji yi meyanglutsü aser mayoktsü ozüng latetaka, yimsüsürtemi anir tama raksar, ibayongji tamakok alur. Ashiko, Nagaland nunga yi nokdangtsü ozüng akanga mamshitetbaji yimsüsürtemi yi majem maremba ajanga asütsüa akok. Tang Bihar nung yi nokdangtsü latetba ozüng yagi yimtak yimtsüngtem nung tama nokdangtsü, anungji yimtak yimtsüngtem nungbo peisasa yangluba yia meyangludaktsütsü aser tanga (company) yi Indian Made Foreign Liquor (IMFL)-a meyokdaktsütsü aser mejemdaktsütsü. Ajisüaka, town-tem nungbo peisasa yangluba yi meyangludaktsütsü nokdangba dak alaka sorkar tazüokba kübok IMFL yi ayokdak ishikabo lapoktsü aser item dokantem nungji talir aser tayokertemi ochishia shishilembatsü atema CCTV enoka ayutsü. Iba sülen dang sangküm nungiang town-tem nunga IMFL yi mayoktsü aser majemtsü ozüng küma benshitsü. Iba ozüng ya mapa küma inyaka otettsü atema Excise aser Prohibition department-i nübortem den osangtsüsang agiteptsü atema angati jembitettsüsa telephone number ana agüja lir, anungji nisung kari danga Bihar nung yi anema latetba ozüng, ” Bihar Excise (Amendment) Act, 2016′ anema inyaka ngura, excise purtem dang iba telephone number ajangaji osang agütsütsü. Iba ozüng mapa küma inyak tenzükdang, Bihar nung kibong aika nung yi mulua aliba tesem aser osettsüsettem police-temi raksatsüyonga ao aser Bihar State Beverages Corporation Ltd pur ket nung anünga aliba (country made liquor) yi bottle lakh 13.50 ali menüngba gari bener arua menüngrepa raksaa endok. Atangji, tang Bihar nung yi mulua ayokba anendaktsüba agi kibong aika mapa maka kümogo, anungji item kibongtem nemji tanga business mapa inyaktsü asoshi sorkari lenmang sayutsübaji kanga tenüngdaktsü mapa ka asütsü. Joko, Bihar nung shibai tashi mangai yi yangludir mesüra yokdir mesüra jemdir, pei pei yari temerenshi lir aser item rongnung tasüba temerenshi agütsütsü tashi lateta lir. Tang Bihar nung yi nokdangtsü asoshi ozüng latetba aser mapa küma inyakba inyakyim ya Nagaland nung yi nokdangtsü latetba aser inyakyim den medemdangra, parnok ozüng aser inyakyimji tajungba asütsü amai angur. Nagaland nungbo peisasa yangluba   (local) yi nokdangbabo kanga mangur aser IMFL  ayokertem nem temerenshi agütsüba kanga mangashir. Ibaji dang masü saka ozüng raksaba osang agütsütsü asoshi Excise department purtemi nübortem nem telephone number agüja mali. Ano, tongtibang kaji, Nagaland chief ministeri anir yi nokdangtsü ozüngbo latet saka yi majemtsübo tenangzükba magitet. Item ajakji ano khen jungjunga bilemdanger, Nagaland nunga yi nokdangtsü latetba ozüng ya ano khen meyipa reprangshir, mapa küma inyaktettsüsa, tajungba aser takangba latettsü nüngdak reprangtetter.