Bihar nung yi meshimeshia nokdangtsü: Nitish

Patna (Bihar), November 26 (Agencies): 2016 küm April 1 nungi tenzüka state nung yi nokdangtsü, ta Brihostibar nü Bihar Chief minister, Nitish Kumar-i sangdongogo.
Assembly election mapang Nitish Kumar-i state nung yi nokdangtsü nangzüka liasü, aser tanü Patna nung Prohibition Day anogomung amungba official sentong ka nung pai state nung yi nokdangtsü sangdong.
Kumar-i, sensaker rongnung sensaktibatemia yi ajemer, iba yongji parnok kibongtem timtemer aser parnok chirnürtem nem shisaliok tajung magütsüteter, iba den külemi kidang kibong nung rara adokba kuli tulubaji yi ajanga lir, ta ashi.
“Yi ajemba tali bulua akumba ajanga tangar dang nungi tetsürtemi timtem taliba ajangshir,” ta paisa ashi.
CMO ketdangser kati, ketdangsertem den temaba senden ka amenba sülen Kumar-i iba telemtetba agi, ta ashi.
Taküm July ita nung Nitish-i, taruba assembly election nung pai maneni takok ngua sorkar tashii arura state nung yi nokdangtsü, ta sangdonga liasü.