Bihar nung yi nokdangba ozüng alema inyakba atema police 400 anentsüogo

Patna, Mongputeni/October 26 (Agencies): Küm ana ser tesadang shi tejaklen Bihar sorkari state nung yi nokdanga liasü, ajisüaka yi nokdangba ozüng alema inyakba atema Bihar nung police ketdangser 400 dak tema mapa nungi anentsüogo, ta tanü ketdangsertemi metetdaktsü.
Bihar police indang Economic Offence Unit-i mapa nungi anenja aliba ketdangsertem indang kiojen sota ayutsü atema inyakyim tenzükogo.
State police tongti, K.S. Dwivedi-i, state nung yi nokdanga aliba mekongshitsü atema tarutsü nunga sorkari mera tapet agia inyaktsü, ta metetdaktsü.
Bihar nung yi nokdangba sülen iba ozüng alema inyakba atema nisung lakh 1.61 dak tema puogo, ajisüaka tang tashi nungbo nisung 141 dang aija temerenshi obendang agüja lir, ta Excise & Prohibition Department ketdangser kati metetdaktsü.
2016 küm Rongchii/April 5 nü Chief Minister, Nitish Kumar-i aniba party, Janata Dal-United-i state nung yi khenyongi nokdanga liasü.
State nung yi nokdangba sülen police-i tesem lakh 4 dak tema mita ogo aser Excise Department-i yi (foreign-made liquor) litre lakh 16 aser linük nung yangluba yi litre lakh 9 puogo.
Chief Minister, Kumar-i ozüng benokba agency tem dang yi nokdangba ozüng alema inyakertem nem temerenshi tulu agutsütsü tuyua lir.