Bihar nung yi nokdangba sülen ozüng alema aibelen 27% ajemogo

Patna, May 06 (Agencies): Bihar Chief Minister, Nitish Kumar-i tamalen, state nung yi nokdangba sülen ozüng alema aibelenba ken otem kanga ajema kümogo ta jembia liasü, aser pai jembiba oji Bihar nung police crime statistics ajangaa metentsüogo.
Police Crime statistics ajanga, yaküm April ita nung state nung yi nokdangba sülen ozüng alema inyakba ken o shilem 27 shi ajema kümogo, ta ashi.
State police headquarters nung bendenba osang ajanga sayuba agi, yaküm küm data den medemdangra taküm April ita tashi nung nisung tepsetba, sen yong nisung apuba, tashiyim amshia tetsür raksatsüba, auyaba, tetsürtem anema inyakba, arms act aser SC & ST raraba densema ozüng alema inyakba ken o kanga ajema kümogo, ta ashi.
Yaküm April 5 nü Chief minister, Nitish Kumar-i state nung yi ayokba aser ajemba khenyongi nokdanga liasü.
2015 April ita nisung tepsetba ken o 276 aliba nungi 2016 April ita tashi nung nisung tepsetba ken o 206 tashi ajema aluogo, ibaji shilem 25.36 ajema akumba lir, ta Hokolbarnü Additional director general of police (Law and Order) Alok Raj-i ashi.
Police headquarters-i item osangji SSPs aser SPs dang nungi bendenba osangtem liasü.
Kasa osang ajanga ashiba agi, 2015 April ita nung sen yong nisung 12 pua liasü saka tesüiba küm ka nung nisung apuba ken o ka dang liasü. Tashiyim amshia tetsür raksatsüba ken o 112 aliba nungi takümbo ken o 59 dang lir, aser ibaji shilem 47.32 ajema akumba lir.
Yi nokdangba kija ajanga ozüng alema inyakbatem ajema akumer asü ta asüngdangba langzüdang ADG-i, “Taküm April tashi nung ozüng alema aibelenba ken otem ajema akumba ya tongtibangsüa yi nokdangba aser moral policing ajanga lir,” ta ashi.
Bihar ya ‘dry state’ ta sangdongba sülen ozüng alema aibelenba ken o shilem 27 ajema kumogo, ta Chief minister, Nitish Kumar-i aiben jembia arur.