Bihar nung yi noktangba sülen yi jemertemi ‘de-addiction centre’ bushir

Patna, April 8 (Agencies) : Bihar nung yi noktangba sülen anogo ana tsüngda state kübok de-addiction centres aser mozüki balala nung nisung 750 tashi teyari bushia aruogo.
Osang angazükba agi, de-addiction therapy agitsü atema nisung aika kümogo aser iba jagi sorkari tesem aika nung alcohol de-addiction centres lapoktsü sentong atongdar.
Kanga dang ajungbena yi noktangba ajanga yi jemer noklang aika mozüki balalai shiranga anir aru. Parnok tekolak angohba, tongtonglatsü atuba, atentenba aser tango junga mesashitetba timtemtem ajuruba atema anepalutsü anir aru.
Tan hopta sorkari state tesem balala nung de-addiction centres 38 lapok aser item nung doctor 150 aser specially trained counselors 45 mapa lemzüktsüogo.
Bihar nung de-addiction centre balala nung nisungtem masemer aser kibong nung rarabangsen adokba kanga ajema kümogo, ta Bihar state Women’s Commission chairperson, Anjum Arah-i osangbener dang ashi.
“Tetsür anema mapa inyakba tatalokbatem kanga ajema kümogo. Tesüiba anogo ishika tsüngda onok tsüngdang ken o kecha mebenok” ta Anjum-isa ashi.
Bihar nung yi noktangba sülen police-i yi shibelener nisung 1,057 puogo aser yi yangludak 353 tashi mita ogo. Tanü tashi nung police-i yi litre 56,532 raksa endokogo.