Bihar rong lendong nung tetsür 4 asü, 5 mangur

Dehri-on-Sone (Bihar), August 20 (Agencies): Brihostibar nü Rohtas district, Bihar nung aliba Sone ayong nung rong ka meküpbokba mapang tetsür pezü asü aser pongu mangu bushidagi.
Iba rong nung tetsür parnok ter ser pongu mena liasü aser parnok rongnungi par pongubo tzü nungi anitetogo saka parnok ajak kanga mejungi yirur lir.
Item tetsürtem ya aluyimba maparen nung sentakba mapa kar asoshi iba ayong tiyong nung aliba asetkong kati aoba mapang parnok amenba rongji tzü nung meküpbok, ta Dehri-on-Sone sub-divisional officer Pankaj Patel-i ashi.
“Rongji tzüperep ka ajangtsü merangdang meküpbok. Tang tashi nung tasümang pezübo nguogo, pongu kanga mejungi yirur kümzüka lir aser kabo la sasa tzüküm atong, saka tanüngba ponguji ano mangur,” ta Patel-sa ashi.
Iba lendong ya Anikat yimtsüng anasa ataloka liasü.
“Iba lendong nung asürtemji Parvati Devi (40), Mahangi Devi (35), Radhika Devi (32) aser Champa Devi (38) nunger liasü,” ta Sub Divisional Officer-i metetdaktsüogo.
Teyirurtemji district Narayan Medical College & Hospital nung anir oa yaridagi.
Tang tashi nung mongui alirtem bushitsü asoshi tenzükogo aser iba maparen nung yariteptsü asoshi tzü telungi aitsüba nisung kar jaloksemogo, ta SDO-isa ashi.