Bihar sorkari state nung yi ozüng tesashiba benokogo

Patna, October 02 (Agencies): Bihar ano tanaben ‘dry state’ küma sorkari Mahatma Gandhi asoba anogomong nung Bihar Excise and Prohibition Act ozüng tasen benokogo, ta ketdangsertemi ashi.
Chief Minister, Nitish Kumar-ia, sorkari yi nokdangba magientsü, ta metetdaktsü.
“Deobarnü Chief minister mendenbuba state Cabinet temeja senden ka mena liasü, aser iba senden nung state nung ozüng tasen benoktsü atema agizük,” ta Patna nung osangbenertem dang Chief Minister’s Office ketdangser kati metetdaktsü.
“Iba senden nung minister ajak dena liasü aser state nung yi meshimeshia nokdangtsü atema sorkari benokbaji ajaki agizük,” ta ketdangserisa ashi.
Hokolbarnü Patna High Court-i, Bihar nung yi nokdangba ozüngji temzüng alema ta metetdakja liasü. Taküm April 5 nungi Excise and Prohibition Act tejenba ozüngtem benoka liasü.
Ajisüaka high court-i tetuyuba magütsüdangyongi state sorkari October 2 nungi yi nokdangba ozüng tesashi benoktsü ta metetdakja liasü.
State Additional Advocate General, Lalit Kishore-i ashiba agi, Patna High Court tetuyubaji taküm April ita nungi benokba Act tejenba den sentaktepa lir.
Paisa ashiba agi, high court tetuyubaji ajanga Act tasenba nung mekongshitsü, kechiyong Act tasenba ya Bihar legislature nung House anapronglai agizükba den külemi state Angh, Ram Nath Kovind-ia agizükogo.
Deobarnü senden tembangli osangbenertem den jembidang Nitish Kumar-i, “Ozü sorkari yi nokdangba khenyongi magientsü. Yi nokdangtsü mapaji onok teinyaktsü mapa lir,” ta metetdaktsü.
Nitish Kumar-isa, Mahatma Gandhi ya nüburtem temaitsü ka lir, ibayongji sorkari pa asoba anoogmung nung ozüng tasenba benoker, ta ashi.
Honibarnü Chief Minister-i nübur ajak, talisa tetsürtem dang sorkari state nung yi nokdangba maparen nungitdaktsüner, ta mepishia liasü.
Bihar yi ozüng tasenba kübok, kidang yi rizünga lira kibong nung tain züngsemtem ajak aputsü.