Bihar takok sülen RJD-i züngsem tasen lakh 50 dak rangloker

November 24, 2015 : Patna Party office nung senden amendang RJD tekolakba Lalu Prasad-i party MLAs, Ministers aser MPs tem den jembiba noksa nung angur. RJD-i December 15 tashi nung züngsem tasen lakh 50 party nung anioksemtsü sentong lir.

Patna, November 24 (Agencies): Bihar assembly election nung kanga sashia takok anguba sülen Rashtriya Janata Dal (RJD)-i party züngsem aser activist tem dang züngsem tasen lakh 50 anioktsü merangang inyakang ta shiogo.

Bihar nung küm 10 yimsü asütsü maongka monguteti aruba sülen, RJD lennir Lalu Prasad-i Chief Minister Nitish Kumar’er telok, Janata Dal-United aser Congress den loktepa Grand Alliance tentettsü telemtetba agir state politics inyakba ajanga tan kanga tashi ita nokdaktetogo aser ibaji ajanga takok tulu angu.

Lalu Prasad-i RJD nung lennir aser activist tem dang party-i züngsem tasen lakh 50 bosa puazüktsüla, ta ashi.

“Party nung züngsem tasen lakh aika bushia anioktsüji nenok khuret lir,” ta Lalu Prasad-i Patna nung senden amendang ashi.

Iba senden nung Lalu Prasad’er jabaso ana, Tejaswi Yadav, deputy chief minister of Bihar, aser Tej Pratap Yadav, health minister naprong dena liasü.

Kasa senden nung tan election nung adoker RJD MLA tem den külemi taoba mapang MLA kar, tang aser tesüiba mapang MP tem aser tan election nung madoker candidate tema dena liasü.

“RJD-i memunui netsüng bushiba sentong tuluka tenzüka züngsem renlokba mapa inyaktsü. Onoki züngsem tasen lakh 50 dak rangloker iba inyakyim tenzüktsü aser December ita 15 nü tashi nung iba nükjidong atongtsü onok sentong lir,” ta party lennir tejen aser tesüiba mapang MP Jagdanand Singh-i metetdaktsü.

“Onoki züngzükba shitak onoki inyaktsü. Lanur tejangrar aika aliba ajanga iba takok tulu ngutetogo. Onoki lanurtema iba inyakyim nung tendaktsüner,” ta pai shisem.