Bihar tamakok anguba kuli agütsütsüla: Shatrughan Sinha

Patna, November 18 (Agencies): BJP bangdak lenirtem maneni aija tanü BJP MP, Shatrughan Sinha-i, kari tang tashi Bihar election tamakok nungi tangazükba magir, ta ashiba den külemi pa nem temerenshi agütsütettsüsa shinga tasü mait, ta ashi.

LK Advani densema BJP lenir taintemi Bihar tamakok kuli bushisüngdangtsüla ta akhangba pusema Sinha-i, Bihar election tamakok anguba nungji party nungi ajak densema lir ta asübaji tagizüktetla masü, aser party nung metongshitsü asoshi tamakok anguba kuliji nijatem nem tongloktsütsüla, ta ashi.

Lok Sabha MP aser actor, Sinha-i aiben party aija jembir aser party nungi shingaia pa nem temerenshi magütsütetba atema-a pai jembiogo.

“Nisung karbo maneni masetshir, tangazükba agitsü memelunger, tang tashi osang tai agütsüba ajanga mangatettep adokdaktsür. Taoba Home Secretary R K Singh aser Bihar nunger keyii jembibaji shitak. Küna nem temerenshi agütsütsüsa shinga tasü mait,” ta Sinha-i twitter ajanga ashi.

“Tamakok aludaktsürtemi kechi kodaser, kong aser komaser item ajak atalok’ar langzütsüla. Parnoki chichiba BJP lenir taintem temelung asütsüsa telangzüba agütsütsüla,” ta paisa ashi.

Bihar assembly election nüboyim tenzükba mapang nungi Sinha-i BJP aija arur, ajisüaka tang tashi nungbo pai bangdakpur masü saka state lenirtem dang aija arur.