Bihar temeten atema ni maneni raratsü: Nitish Kumar

Patna, August 23 (Agencies): Deobar nü Bihar Chief Miister Nitish Kumar-i, pai par state temeten atema maneni raratsü, ta ashi.
“Ni Bihari nunger. Bihar temeten atema ni maneni raratsü. Nisungtemi kechi jembiner’ar jembiang. Bihar asoshibo ni koleni onüdi aotsü. Nüburtemi iba asoshiji asayamenütsü nunga ni kecha au, ta mali,” ta Nitish-i ashi.
“Sorkari light atema scheme nüngja melenshiogo, iba scheme nüngjaji Rajiv Gandhi tenüng nung liasü. Telemsa shilem 90 Centre sorkar nungi aser shilem 10 state sorkar nungi liasü, tangbo iba telemsaji Centre sorkar nungi shilem 60 aser state sorkar nungi shilem 40 kümtsüogo,” ta paisa ashi.
Tawa Ato kilonser Narendra Modi-i state nem senotsü crore lakh 1.25 agütsütsü ta jembiba o Bihar CM Kumar-i aija, iba teyari atema Ato kilonseri sangdongba yimyaji Bihar auction asütsü ama jembiogo, aser ibaji ajanga pai “cooperative federalism” anema jembiogo, ta ashi.
Tanep Ato kilonser Modi-i, taoba UPA sorkar dang Kumar-i state atema sen crore 12,000 dang mepishia liasü, aser yimtenren nung tajangzük angutsü atema pai state mejangjaba tia ka nung toktsü, ta aija liasü.