Bihar tenüng temenüktsü : deputy CM

Patna, January 10 (Agencies): Bihar Deputy Chief Minister Tejaswi Yadav-i, BJP-i aniba opposition dang temzüng ozüng tsütsü state nem tenük menük bentsür aruba olulutem anenang, ta Deobarnü ashi.
“Bihar nung makizüktetba politics amshiba anenang. Chief Minister Nitish Kumar-i aniba Grand Alliance sorkari ozüng, yimsüsüba aser terenlok dak rangloker inyaker. Bihar ya terenlok state ka akümtsü asoshi onoki sentong tejangja yanglur inyakyima aoer,” ta pai Patna nung osangbenertem dang ashi.
Pathankot, Punjab nung atalokba mesüka linük nung tesem mashi ka nung kiralogrartemi amakba ajanga iba tesem dangji aatank raj’ (reign of terror) ta ajatsü asü ? ta Tejaswi-i BJP aser parnok den lokteper aliba party lenirtem dang asüngdanga liasü.
“Kiralongrartemi linük nung lendong agütsüba ajak dang ‘reign of terror’ ta ajatsü asü,” ta RJD leniri ashi.
“Süra kechiba ozüng alema benshiba kar adok dang ‘jungle raj’ ta ajar,” ta pai asüngdanga liasü.
Deputy chief minister-i ashiba agi, BJP aser parnok den lokteper aliba party temi Bihar ya arem yimsüsüba leni meyipa aoer ta shia state-i makizüktetba politics asayar, ta deputy chief minister-isa ashi.
“Onoki temzüng ozüng anema kodanga meinyaktsü aser ozüng anema inyakertem pua ochi obendang agütsütsü aser ajak nem security agütsütsü asoshi onoki poice ketdangsertem nem tetuyuba agütsüogo,” ta Tejaswi-i ashi.