Bihar terenlokji India linük atema tongtibang: PM Modi

New Delhi/Hajipur, March 12 (Agencies): Honibarnü Ato kilonser, Narendra Modi-i Bihar, Hajipur nung tang tasen yangluba Digha-Sonepur railway den gari atema apu lapoktsüba sülen pai, India linük terenlok atema Bihar ji tongtibang, ta ashi.
Project lapoktsüba sülen lokti senden ka nung jembidang pai, “Yangi nüburtem pelaba reprangtetba ajanga iba apu ya kanga tongtibang ta ni shiteter. Iba project ya Nitish Rail Minister inyakdang aser Atal (Vajpayee) Ato kilonser inyakdang tenzük, aser tangbo iba mapa tembanga inyakogo,” ta ashi.
“India tia melenshitsü atema asenoki Bihar tia tama melentsüla,” ta Modi-i ashi.
“Rail lenmang aser gari lenmang nung terenlok atema tajemdakdak tashi aliba dang masü saka rongsenkettsüng aintsü atema-a tashi lir,” ta paisa shisem.
Taoba Bihar assembly election nung BJP-i tamakok anguba sülen tang party jenjang yanglushitsü tebilemba nung  Modi-i, “India terenlok atema tiyongtsüji linük anüdoklentsütsü lir. Bihar ya onok atema tongtibang, kechiyong India terenlok atema Bihar nung terenlok alitsüji tongtibang ta onoki bilemer,” ta ashi.
Ato kilonser, Modi aser Bihar chief minister, Nitish Kumar nati assembly election mapang tako chitepa aitsütepba sülen tanübo rail project lapokba sentong nung sabang ka nungi tenati kati ka indang tajung jembia liasü.
Iba sentong nung Nitish-i  jembidang nisungtemi ‘Modi Modi’ ta ayimtenba Modi-i noktaker songtema liasü. Ano külen Nitish-ia Ato kilonseri state semdangba atema pelaba olen jembiogo.
Nitish-i, “Rongsenkettsüng aintsü atema Centre aser state  nati senteper yaritsü,” ta ashi.