Bihar topper nungi süpokrem sen lakh 20 agi

Patna, June 23 (Agencies): Bihar nung taoba Bihar School Examination Board (BSEB) mendenbuba, Lalkeshwar Prasad Singh-i metemsüi aliba kaketshirtem nem topper jenjang agütsütsü atema ashikülaker telok ka dang nungi süpokrem sen lakh 20 agiba nangzükogo, ta police-i ashi.

Singh-isa intermediate college tem affiliate asütsü atema college shia nungi sen lakh pezü agi, ta police-i ashi.

Singh aser pa kinüngtsü (taoba MLA aser taoba professor kinüngtsü), Usha Sinha na anogo asem atema police ket nung agütsüogo.

Patna SSP, Manu Maharaaj-i ashiba agi, Singh BSEB mendenbuba inyakdang pai college 100 dak tema affiliate süja liasü. College principal, Bachcha Roy leniba nung ashikülakertemi taküm Class 12 tatidang nung ochimashi mapa inyak, aser iba ken o dak sentakba nung Hombarnü Singh aser kinüngtsü naprong Varanasi nung lia apu.

Iba ochimashi ken o ya May 30 nü temai adoka liasü, iba anogo nung osangbenertemi toppers ana- Ruby Rai aser Saurabh Shreshta na dang tenati mark junga anguba subject tem nung interview agidang tenati telangzüba magütsütetba yong iba ochimashi jungkai adoka liasü.

“Police-i FIR nungji Bihar Higher Secondary Education director, Rajiv Kumar Prasad Ranjan tenünga züngsemtsüa akok. Item college tem affliate sütsüba Board nung paa züngsem lir,” ta SSP-isa ashi.

Bodhbarnü ketdangsertemi Bihar, Vaishali district nung affiliate süa aliba college pezü anentsüogo aser item principal tem anema ken o benoktsü, ta BSEB ketdangser kati ashi.