Bihar tzümetsüng lendong nung ano nisung 19 süogo

New Delhi, September 04 (Agencies): Bihar nung tzümetsüng lendong nung maneni nisung 19 süogo, aser ibaji densemabo tang tashi nung state nung nisung ajak agi 198 tashi süogo.
District pongu nungi nisung 19 asüba osang lir. Nisung timtibaji Patna nung 10 asü, iba sülen Saran nung nisung trok aser Lakhisarai, Samastipur, Begusarai shia nungi nisung kaka asü, ta Disaster Management Department osang ajanga metetdaktsü.
Tzümetsüng ya Ganga ayong nung tzü tali metsüngba ajanga ataloker, iba dak alia tzünglu ajanga Sone, Punpun, Burhi Gandak, Ghaghra, Kosi ayongtema metsünga disctict 12 kübok yimtsüng 2,179 nungi nisung lakh 41.90 dak tema kongshiogo.
Item districts nungi tang tashi nung nisung lakh 6.96 aienshidaktsüogo.
Water Resources Dept. osang ajanga ashiba agi, Patna district kübok Digha ghat, Gandhi ghat aser Hathidah nung aser Buxar, Munger den Bhagalpur districts nung Ganga ayongtzü ajema kümdar, ajisüaka Bhagalpur district kübok Kahalgaon nungbo tzü lendongbang nung yimdar.
Yashi nungi Patna nung tzünglu mm 6.3 aruogo aser maximum temperature ji 33.4 degrees Celsius liasü.