Bihar tzümetsüng nung asür 119 jungogo

Patna, August 18 (Agencies): Bihar nung tzümetsüng agi nisung crore ka shi kongshiogo, aser tang tashi nung nisung 119 süogo, ta Hokolbarnü ketdangser kati metetdaktsü.
Bihar disaster management department ketdangser kati, tzümetsüng ajanga district 16 nung block 136 kübok nisung lakh 98 dak tema kongshiogo, ta metetdaktsü.
Tzümetsüng agi azü ki meyirjang aika ponger ao, kiojen, gari lenmang, apu aser sen crore aika jenjang aonsotsü raksatsüogo.
Ketdangseri ashiba agi, tesüiba anogo pezü tsüngda Army, NDRF aser SDRF-i nisung 408,903 ainshidaktsüogo.
State sorkari tejenokdak ki 1,238 yangluogo aser yangji nisung 3,10,041 jenoka lir.
“Brihostibar aonung nungi ayong aika nung tzü kanga metsünga tesem aika atsüngbangogo aser Hokolbar aonung tashi nungbo tzümetsüng agi kongshirji nisung crore ka ajungtsü,” ta ketdangserisa metetdaktsü.
Tang tashi nung nisung 119 süogo aser timtibaji Araria district nungi nisung 23 asü, iba sülen Sitamarhi nung nisung 12 aser Kishanganj, East Champaran, West Champaran aser Supaul district shia nung nisung 11 asü.
Madhubani nunga nisung tenet, Madhepura nung nisung pongu, Purnea district nung nisung pongu, Darbhanga aser Saharsa district na nung nisung pezüzü aser Gopalganj o Khagaria district na nung nisung asemsem asü.
Tesüiba anogo asem tsüngda Kishanganj, Araria, Purnea, Katihar, East & West Champaraan district tem kija nunga tzümetsüng agi nisung lakh 60 shi kongshiogo.