Bihar, U’khand, UP nung yipru aser tsüngi ajanga nisung 38 asü

Lucknow, Monupii/May 29 (Agencies): Bihar, Jharkhand aser Uttar Pradesh nung yipru den tzünglu aser tsüngperet ajanga nisung 38 süogo aser aika yiruogo; IMD-i maneni tan hopta tsüngsang-mopung majungtsü ta sangdongogo.
Asürtem rongnung parnok 17 Bihar nungi liasü. Gaya nung nisung pezü asü, Munger nung asem, Aurangabad nung pongu aser Nawada nung nisung ana asü. Osang angazükba agi Katihar kübok Pekha yimdakbo kibong ka nungi nisung asem asü.
Ano Jharkhand nunga nisung 12 asü aser 28 yiru. Asürtem rongnung state yimtiba, Ranchi nungi asem liasü.
Ano Uttar Pradesh tesem balala nung yipru aser tsüngperet ajanga nisung 15 asü aser nisung ter yiruogo, ta sorkar ketdangser kati metetdaktsü.
“Tentonü (Hombar) nikongdang yipru aser tsüngperet ajanga Unnao district nung nisung trok asü, Raebareli nung nisung asem asü, Kanpur, Pilibhit aser Gonda districts shia nungi nisung anana süogo,” ta Uttar Pradesh relief commissioner, Sanjay Kumar-i metetdaktsü.
Unnao District Magistrate, Ravikumar-i, tsüngperet ajanga nisung ana asü aser tangartemji ki chirepba, süngdong aser light indong laoba ajanga asü, ta metetdaktsü.
MeT department-isa, taruba anogo ananü state kübok tesem balala nung tzünglu sashia aruba den yipru aittsü, ta tekümdangtsü metetdaktsüogo.
Monupii/May 2-3, 2018 anogotem nunga state pongu nung yipru ajanga nisung 134 asü aser nisung 400 dak tema yirua liasü. Item state rongnung Uttar Pradesh tamajungba kongshi, kong nisung 80 tashi asü aser asürtem timbaka Agra district nungi liasü.
Maneni Monupii 9-10, 2018 anogotem nunga yipru ajanga nisung 18 asü aser Monupii 14, 2018 nüa yipru ajanga nisung pongu asü.